Ei veke med fotografering av hare på Vauldalen, tog på Røros, fotokveld på Rørosmuseet og til sist i veka fotografering av traner ved Hornborgasjøen i Gøtaland. Og det blir meir traner i neste veke og.





Ei veke med fotografering av hare på Vauldalen, tog på Røros, fotokveld på Rørosmuseet og til sist i veka fotografering av traner ved Hornborgasjøen i Gøtaland. Og det blir meir traner i neste veke og.
Harane på Vauldalen er viden kjende. Bileta til Erlend Haarberg har vandra «verda rundt» og tatt med seg mange gjeve prisar heim. Erlend har fotografert harer her i rundt 20 år. I fjor stilte han harane «sine» til disposisjon for andre fotografar. Mange reiste til Vauldalen og kom heim med minnebrikkene fulle av harefoto. Så gjorde eg – tre netter blei det i fjor. Og herom dagen var eg tilbake. Værutsiktene var bra – «huggu buvêr» som eg hadde håpa på! Utpå kvelden letta vêret litt men fortsatt godt med vind og snø. Vind og snø gir gode fotoeffektar.
Erlend Haarberg har rigga opp lys. Mellom lyset og fotografen som sit inne i hytta, finn harane havre. Fotomessig gir det flotte effektar med haren i siluett foran lyset. Ei utfordring iallefall for meg, er å få haren skarp. Når dei første harane dukker opp i blåtimen, går det greit. Etterkvart som lyset svinn blir det meir utfordrande. Høg iso og kort lukkartid må til for å fryse bevegelsane til haren. Eg har valgt å konvertere ein del av fotografia til svart /kvitt – passer betre på nattelyset her. Ein del foto legg eg ut her. Telleverket stoppa på rundt 1500 foto – men mesteparten ender i søppelbøtta. Fotoutstyr: Nikon D850, Nikon 200-400 f4 og stativ.
Noen «kampfoto» – slåssing om mat og posisjon på foringsplassen.
Sju nye foto frå denne veka – ingen spesielle tema men kun foto tatt i «forbifarten». Det har blitt 86 foto til nå lagt ut på Instagram under #2022dagfordag.
Ei ny veke med sju foto. Det har blitt fire korte turar opp til Storwartz for å fotografere kveldslyset og månen. Det var fullmåne på slutten av denne veka. Det blei vel bare fotografiet frå dag 73 og 77 som er omtrent slik eg hadde tenkt dei.
Litt om fotografiet frå dag 79. Eg hadde fotografert månen på veg opp bak Viglane utan at resultatet blei slik eg hadde tenkt. Men greit nok til å bli lagt ut på Instagram under #2022dagfordag. På veg ned frå fjellet kryssa løypemaskina til Røros tur og løypeforening vegen like foran meg. Eg stansa bilen, og fekk tatt eit par foto før fotomotivet forsvann inn i bjørkeskogen. Det blei eit foto som fortel – dokumenterer- løypekjøringa . Eit arbeid – ofte usynleg -som blir gjort for at skispora skal vera klåre til neste dag. Fotoet frå dag 74 er i same kategori. Skulebussane står utanfor skulen kvar dag utan at me reflekterer over kor viktige dei er for å halde samfunsmaskineriet i gang.
Ei veke – årets tiende -med foto frå Ålesundstraktene pluss Romsdalshorn lagt ut på Instagram under #2022dagfordag. Eit lite utvalg av foto frå denne veka i Ålesund. Det er mange andre foto som kunne blitt med. Foto frå krykkjekolonien på Aspøya, Borgundfjordfiske etter torsk – folkeliv på fjorden, havørna som var å sjå nesten heile tida, Ålesund sentrum….. manglar ikkje på motiv.
65 foto publisert så langt og 300 foto igjen før året er omme. Når eg ser på dei fotografia som er lagt ut så langt er det ingen rød tråd på utvalet. Litt av kvart… Denne veka har det blitt fuglefoto, landskap, planter- og eit foto frå eit fotooppdrag for SJ-NORD: Fotografertge på ein togtur frå Røros til Hamar med nytoget Type 76.
Eg har to fotobøker i bokhylla som har vore til inspirasjon for prosjektet mitt – utan samanlikning forøvrig:» Året – En bild-ett øgonblick-varje dag hela året» fotografert og skrevet av Terje Hellesø, norsksvensk naturfotograf. Året er 2006 og naturen er studio. «365 days» fotografert av Stavangerfotografen Alf Ove Hansen. Året er 2011 og Stavanger kommune er studio. Fotografen hadde eit år i «indre eksil» innanfor Stavanger kommunes grenser. Ei bok som på ein flott og respektfull måte syner fram livet i Stavanger gjennom eit heilt år. Og fotografen er så dedikert til oppgaven sin at når han får eit lite hjerteinfarkt så er kameraet med inn på sjukehuset og opp i sjukesenga!
Då er 58 foto lagt ut med #2022dagfordag på Instagram. Enkel rekning tilseier at det då berre er 307 foto att. Til no har det gått greit å finne motiv – kamera enten i form av Nikon, Olympus eller Iphone er med nesten heile tida. Nokre dager har eg ein ide om kva eg skal fotografere mens andre blir det som det blir.
Ei ny veke med foto til Instagramprosjektet #2022dagfordag. No har eg lagt ut 51 foto. I veka som var har det blitt mange foto av hornugla som uventa dukka opp ved flyplassen. Mange timar er tilbrakt ventande på ei hornugle på jakt etter markmus. Men eg kan ikkje berre vise uglefoto her. Hornugla får bli tema for ein eigen blogg seinare.
Oppsummering av veke 6 i #2022dagfordag – foto nr 38 til 44.
Feistein fyr i Klepp kommune, Rogaland har vore ein av dei over 200 bemanna fyrstasjonane langs kysten. Fyrtårnet står der framleis – automatisert – og viser veg for sjøfarande. Feistein fyr er eit blikkfang for alle som ferdes langs Jærstrendene, også for oss fotografar. Holmen og fyret uti havet er eit kjært motiv.
Feistein kjem frå gammalnorsk Feðjarsteinn som tyder gjerde eller skillevegg. Navnet kan vise til at holmen er ein del av ei rad med skjær og grunner som danner eit stengsel – ein bølgebrytar – mot storhavet.
På det næraste er det ca to km frå fastlandet ut til holmen Feistein. Første fyret her blei bygd i 1859 og det har gjennomgått mange endringar sidan den gongen. I mange år budde fyrvoktaren med familie på Feistein. Det var ikkje ufarleg å bu på fyret. I 1868 blei fyrvokter og ei tenestejente feid på havet av ei storbølge som slo over holmen.I 1988 blei Feistein automatisert, og i 2006 blei fyrlykta erstatta med ei ledlykt (ikkje LED-lykt). På Kystverkets sider er det meir å lese om fyr og bruk av lyssignal for å lede sjøfarande trykt. Feistein drives i dag av ei venneforening – Feistein fyr venneforening – og det er opna for overnatting der.
Fyret ligg for seg sjøl utan anna enn havet rundt seg. Det er eit spennande og utfordrande fotomotiv som er i konstant endring. Dei siste to vekene har me hatt Feistein fyr som «nabo» uti synsranda. Det har vore dagar med fint vêr og sol, snøvêr, hagl,regn og mykje gråvêr. Vind har det vore heile tida – eine natta blåste det opp til orkan styrke. Fotografia under her – eit for kvar dag har alle med Feistein fyr som ein del av motivet.
Utfordringen med å fotografere fyret, er avstanden -ca 3 km frå hytta på Hedlestø. Fotografia kan vere forstørra eller beskåret for å få fram ønska resultat. Dei fleste fotografia er tatt med Nikon D850 og Nikon 200-400mm f4 og varierande brennvidder. Men og Olympus E-M1 MarkIII og M.Zuikoo 12-100mm f4 er nytta.
Oppsummering av veke 5 – foto frå Rogaland og foto nr 31 til 37 i «prosjektet» mitt i år kor eg skal legge ut eit nytt foto kvar dag på Instagram.
30 dagar med mitt prosjekt #2022dagfordag – 30 foto er til no lagt ut på Instagram. Nokre foto ligg det tid og arbeid bak, mens andre er av typen «snapshot» med Iphonekameraet. 335 foto igjen..